Kiungo wa Manchester United, Mjerumani Bastian Schweinsteiger, amesema baada ya kuondoka ndani ya kikosi hicho, hafikirii kujiunga na timu nyingine ya barani Ulaya, na badala yake ataenda kucheza soka katika Ligi ya Marekani au Asia.

Schweinsteiger ambaye amekuwa hafanyi mazoezi na kikosi cha kwanza cha United kutokana na kutokuwepo kwenye mipango ya kocha wa timu hiyo, Jose Mourinho, bado ameonyesha nia ya kuendelea kubaki klabuni hapo.
Kupitia akaunti yake ya Mtandao wa Kijamii wa Twitter, Schweinsteiger aliandika: “Manchester United itakuwa klabu yangu ya mwisho hapa Ulaya. Naziheshimu klabu zingine, lakini Manchester United ndiyo timu pekee iliyonifanya nikaihama Bayern Munich. Nipo tayari kubaki kama timu hii itaendelea kunihitaji.

 

“Hiki ndicho ninachoweza kukisema kuhusiana na hatma yangu ya sasa. Napenda kuwashukuru mashabiki kutokana na ushirikiano waliouonyesha kwangu.”

Mjerumani huyo aliyekuwa kwenye kikosi cha Ujerumani kilichotwa ubingwa wa Kombe la Dunia mwaka 2014, mshahara wake ndani ya United ni pauni 160,000 kwa mwaka na mkataba wake umebakia miaka miwili kumalizika.

Kocha Mkuu wa Taifa Stars, Charles Boniface Mkwasa ametangaza kikosi cha wachezaji kikiwa na mabadiliko kadhaa ambacho atakiandaa maalumu kwa mchezo dhidi ya Nigeria.

Kikosi hicho kina wachezaji 20 ambao atasafiri nao kwenda Nigeria kwa ajili ya mchezo huo wa Septemba 3, 2016 lakini wachezaji wanatakiwa kuripoti kambini Agosti 28, mwaka huu na safari ya kwenda nchini Nigeria itakuwa Septemba mosi.
   

KIKOSI HICHO HIKI HAPA:
Deogratius Munish ‘Dida’
Aishi Manula
Mwinyi Haji
Andrew Vincent ‘Dante’
Juma Mahadhi
Kelvini Yondani
David Mwantika
Himid Mao
John Bocco
Farid Mussa
Jamal Mnyate
Ibrahim Ajib
Shiza Kichuya
Mzamiru Yassin
Mohammed Hussein ‘Zimbwe Jr’
Jonas Mkude
Mbwana Samatta
 Ibrahim Rajabu
Shomari Kapombe
Simon Msuva

HANS POPPE

Ikiwa ni siku chache baada ya Mwenyekiti wa Yanga, Yusuf Manji kumtaka beki Hassan Kessy kuondoa hofu kwa kuwa siku itafika atacheza, Mwenyekiti wa Kamati ya Usajili ya Simba, Zacharia Hans Poppe amesema huenda beki huyo akaendelea kubaki nje ya uwanja kwa msimu huu na mwingine.

Manji alisema hayo juzi huku akisisitiza, Kessy hawezi kutocheza milele.

Lakini Hans Poppe amesema kinachomponza Kessy ni ujeuri wa viongozi wa Yanga ambao wanajua wamekosea, lakini wanataka kuonyesha umwamba.

Akifanya mahojiano na SALEHJEMBE jijini Dar es Salaam, Hans Poppe amesema Yanga wanajua wamefanya makosa, lakini wanataka kuonyesha umwamba kama walivyozoea.

“Waliwahi kutufanyia hivi katika suala la Yondani, safari hii wamerudia na kumsainisha Kessy wakati akiwa bado na mkataba na Simba.

“Kama hiyo haitoshi, mkataba wameufikisha TFF, wameusajili na wakatuma Caf. Sasa sisi tuna kila kitu na ushahidi mwingine wao wenyewe wameupeleka TFF na Caf.

“Kilichotakiwa ni kuandika barua, nilikutana na Chanji (kiongozi Yanga). Nikamweleza andikeni barua mimi nitalisimamia hilo. Lakini hakufanya hivyo, wanataka kuonyesha ujeuri.

“Kama itaendelea hivi, ninaamini Kessy hatacheza. Na hapa wa kulaumiwa ni wao maana Simba tupo hapa,” alisema Hans Poppe na alipoulizwa kama wakiandika barua basi mara moja watamruhusu Kessy, akajibu.

“Wakiandika barua, basi sisi tuna jibu au majibu ya kuwapa. Sasa yatapatikana kutokana na barua yao.”

KIUNGO wa Simba, Mwinyi Kazimoto, leo anatarajiwa kufunga ndoa na mchumba wake aliyefahamika kwa jina moja la Regina, hivyo hataichezea timu yake dhidi ya Azam FC.

Simba na Azam kesho Jumapili zinacheza mechi ya Ligi Kuu Bara kwenye Uwanja wa Taifa, ambayo itatoa njia ya bingwa au timu itakayoshika nafasi ya pili.

Kazimoto anatarajiwa kufunga ndoa leo hii katika kanisa moja lililopo Kongowe nje kidogo ya Dar es Salaam, hivyo hataweza kucheza mechi hiyo.

Kwa upande wake Ibrahim Ajib, yeye ataikosa mechi hiyo kutokana na kuwa na kadi tatu za njano alizopata katika mechi zilizopita za timu hiyo.

Kocha wa Simba, Jackson Mayanja, alisema kukosekana kwa wachezaji hao ni pigo kwake lakini amejipanga kuhakikisha anashinda mchezo huo.

Timu ya Mgambo ambayo juzi Jumatano ilipoteza mchezo wa Ligi Kuu Bara dhidi ya Yanga kwa kufungwa mabao 2-1, imekuwa na rekodi ya aina yake tangu kwa mara ya kwanza ipande kucheza ligi kuu misimu minne iliyopita.

Mgambo ilipanda ligi kuu msimu wa 2012/13 ambapo kwa misimu yote hiyo haikuwahi kushuka daraja, lakini cha kushangaza ni kuwa imefanikiwa kufunga mabao mawili tu ndani ya Uwanja wa Taifa, Dar kwa kipindi hicho chote.

Awali, timu hiyo ilicheza misimu mitatu mfululizo bila ya kuzifumania nyavu za uwanja huo, mpaka walipokuja kuvunja mwiko huo msimu huu walipocheza na Simba Februari 3, 2016 na kukubali kichapo cha mabao 5-1.

Straika wao hatari, Fully Maganga, ndiye aliyefunga dhidi ya Simba na kuweka rekodi ya kuwa mchezaji wa kwanza wa timu hiyo kufunga bao kwenye Uwanja wa Taifa, pia juzi Jumatano, Bolly Shaibu Ajally alifanikiwa kufunga bao dhidi ya Yanga likiwa ni la pili kwa timu hiyo ndani ya misimu minne.

JUMAMOSI, ARPILI 30

Everton vs Bournemouth 

Newcastle vs Crystal Palace 

Stoke vs Sunderland 

Watford vs Aston Villa

West Brom vs West Ham

Arsenal vs Norwich 

JUMAPILI, MEI MOSI

Swansea vs Liverpool 

Manchester United vs Leicester 

Southampton vs Manchester City 

JUMATATU, MEI 2

Chelsea vs Tottenham 

Na Saleh Ally, aliyekuwa La Coruna

SAFARI ya kwenda Hispania kuliwakilisha Gazeti la Championi ilikuwa ni sehemu ya mafunzo makubwa katika kazi ya uandishi wa habari ambayo inataka mhusika ujifunze kwa wakubwa na wadogo, kila kukicha.

Nilisafiri pamoja na washindi wa “Kwea Pipa Kwenda Hispania na Azam Sports HD”. Ilikuwa ni safari zaidi ya shule ambayo katika mengi niliyojifunza, machache naona yanaanza kwenda kama nilivyoamini.

Kama nilivyoeleza juzi Jumamosi, kwamba mimi na wenzangu kutoka Tanzania pamoja na washindi wengine na waandishi kutoka Hong Kong na Sweden, tulipewa nafasi ya kukaa karibu kabisa wakati wachezaji wa Deportivo La Coruna wakiingia vyumbani. Lakini mwisho tukapewa nafasi kama hiyo kukaa kwenye Mix Zone.

Mix Zone ni sehemu maalum ya waandishi ambayo wanaweza kuwahoji wachezaji kabla au baada ya mechi. Pale mwandishi anachagua mchezaji anayemhitaji na kumuuliza swali analotaka.

Huu ni utaratibu wa kimataifa, kwa wale waliobahatika kuripoti mechi kubwa au michuano mikubwa kama Kombe la Dunia wanajua inavyokuwa.

Wakati wachezaji wanaingia vyumbani, kulikuwa na ulinzi mkali na watu wengi waliwekwa hatua takribani 50 upande wa pili wa barabara tofauti na sisi ambao tungeweza hata kupeana nao “tano”.

Wakati wachezaji wakishuka, hata kabla ya kufika pale tulipo, ilikuwa ni rahisi kujua aliyeshuka ni nyota kweli, maana watu walipiga kelele za juu zaidi na baada ya muda ungemuona mchezaji huyo anakuja upande wetu.

Walioongoza kushangiliwa walikuwa ni Iniesta, Lionel Messi halafu Neymar ambaye alibaki ndani ya basi peke yake kwa takriban dakika 5, ndiyo akashuka taratibu kabisa.

Luis Alberto Suarez Diaz, alishangiliwa kwa kiwango cha kati. Lakini ushukaji wake kidogo ulinishangaza, kwani alishuka haraka sana na kukimbia kama mtu ambaye alikuwa akihofia kukamatwa.

Uso wake alionekana kama mtu asiyetaka kuonekana au kuzungumza na mtu. Hakutabasamu kama wachezaji wengine, hakuonyesha urafiki na yeyote na aliwapita wachezaji wenzake waliowahi kuteremka kwenye basi na kuwahi kuingia vyumbani.

SUAREZ AKISAINI JEZI ALIYOPEWA NA SALEH ALLY

Kwa kuwa nilikuwa na baadhi ya waandishi wa Hispania, nilimuuliza mmoja kwamba hiyo ni tabia ya kawaida ya Suarez? Akanijibu:

“Kawaida hapa Hispania, wachezaji hawaruhusiwi kuzungumza kabla ya mechi, hofu ni kwamba unaweza kuwapotezea ‘focus’ (uwezo wa kulenga jambo wanalotaka kulifanya kwa ufanisi).

“Lakini Suarez yuko hivyo, ana hasira na anataka kufunga kila mechi ikiwezekana zaidi ya mabao mawili.

“Ukiwa unataka kumhoji, omba afunge. Kama itakuwa Barcelona imefungwa au hajafunga, usimsogelee kabisa, huwa hazungumzi na mara nyingi anakuwa wa kwanza kupanda kwenye basi.”

Hakuendelea kunipa maelezo kwa kuwa tulitakiwa kuondoka eneo hilo na kwenda kupiga picha na wachezaji wa Deportivo La Coruna waliokuwa benchi. Kwa upande wa wachezaji wa Barcelona, tulielezwa kwamba lilikuwa jambo gumu. Hivyo tukafanya hivyo.

Niliangalia mechi nikiwa makini na mambo mengi, lakini maelezo ya Suarez yalinifanya niwe makini sana kwake kwa muda wote wa mechi nikitaka kujua atafanya nini. Alikuwa ndiye mwiba kwa walinzi wa Deportivo La Coruna, akafunga mabao manne, Barcelona ikishinda kwa mabao 8-0.

Wakati wachezaji wanatoka tukiwa katika Mix Zone, nilisubiri atokee Suarez kuthibitisha yale maelezo ya mwandishi kutoka gazeti namba moja la michezo Hispania la Marca.

Alipotoka tu, nilikuwa mtu wa kwanza kumuita. Alitoa ushirikiano kwa kusaini jezi yangu na kujibu swali nililomuuliza. Hakika alionekana ni mwenye furaha, alipiga picha na watoto wawili, halafu akasogea na kupiga picha na mtu mmoja ambaye alimuomba, nikaamini hilo.

Lakini njaa ya Suarez ikaanza kubadili mawazo yangu, kwamba hata Barcelona wenyewe hawaoni kwa kuwa staa mkubwa au tegemeo zaidi kwao ni Suarez, tena kwa sasa anazidi hata umuhimu wa Neymar na Messi.

Utaona baada ya mechi hiyo, iliyofuatia niliishuhudia kwenye runinga, Barcelona wakiwa nyumbani Camp Nou, wakaigaragaza Sporting Gijon kwa mabao 6-0, Suarez akapiga mengine manne, safari hii akiwa na mawili ya penalti.

Suarez ana njaa kweli na ukiangalia, uwanjani utaona ana tofauti kubwa. Kikubwa kinachomsaidia hachezi kama supastaa. Anakimbiza mpira, anakaba, anabugudhi na anapambana muda wote, jambo ambalo ni nadra kumuona Messi, Neymar au hata Cristiano Ronaldo akifanya hivyo.

Ndani ya mechi mbili, kafunga mabao 8. Sasa ndiye anaongoza kwa ufungaji. Kabla ya mechi hizo mbili alikuwa anazidiwa na Ronaldo mabao matano. Sasa anamzidi mshambuliaji huyo nyota wa Real Madrid mabao matatu. Yeye kapiga 34 na Mreno huyo 31.

Awali ilionekana ni vita ya Messi na Ronaldo, sasa Suarez kaingia katikati na huenda akawa ndiye staa namba moja kuliko wote na huenda baada ya msimu huu akawa ndiye gumzo kuliko wote kama alivyoondoka England akiwa tegemeo na gumzo kuliko wote.

Awali ukizungumzia mabao na pasi, ungemtaja Messi. Lakini Suarez anadhihirisha anajua mno mpira na ndiye baba mpya mwenye nyumba wa Barcelona, yaani tegemeo, kwani baada ya kucheza dakika 2880 za La Liga, kafunga mabao 34 akiwa ametoa pasi 15 zilizozaa mabao. Kama hiyo haitoishi, katika dakika hizo amepiga mashuti 115 na 62 yamelenga lango.

Utaona takwimu zake ziko juu hata kuliko Ronaldo aliyecheza dakika 3059, akafunga mabao 31 na kutoa pasi 11 tu za mabao.

Messi naye amecheza dakika 2458, amefunga mabao 25 na pasi 13 za mabao. Neymar amecheza dakika 2787 na kufunga mabao 23 na pasi 10 zilizozaa mabao.

 Maana yake kama utazungumzia mabao na pasi za mabao au asisti, Suarez hadi sasa ni bora zaidi ya Ronaldo, Messi na Neymar.

Ndiyo anakwenda msimu wa pili wa La Liga, lakini anaonyesha si mtu wa kawaida. Suarez aliyetoka England kama mkosaji, Barcelona wakaonekana kama “wamebugi”, sasa ndiye shujaa mpya wa Blaugrana.

Huyu jamaa, anajua sana. Mbishi, si mwepesi kukubali na anachotaka ni kushinda zaidi ya mara moja, kufunga mabao zaidi ya yanayotegemewa na hii haina ubishi, atakuwa hashikiki na ndiye shujaa mpya wa Barcelona, hasa kama hataharibu na yale mambo yake.

TAKWIMU LA LIGA:

WATANO WANAOONGOZA LA LIGA KWA MABAO:

Luis Suárez

Barcelona

Amecheza dakika 2880  

Mabao 34

Asisti 15 

Cristiano Ronaldo

Real Madrid

Amecheza dakika 3059  

Mabao 31

Asisti 11 

Lionel Messi

Barcelona

Amecheza dakika 2458

Mabao 25

Asisti 13 

Neymar

Barcelona

Amecheza dakika 2787  

Mabao 23

Asisti 10 

Karim Benzema

Real Madrid

Amecheza dakika 1838 

Mabao 23

Asisti 6

SOURCE: CHAMPIONI